महाराष्ट्रात लवकरच नव्या सरकारच्या मंत्रिमंडळाची घोषणा होणार असून, या वेळी शिंदे गटात मोठ्या बदलांची शक्यता आहे. यापूर्वी मंत्री राहिलेल्या अब्दुल सत्तार आणि संजय राठोड यांचा पत्ता कट होणार असल्याची चर्चा राजकीय वर्तुळात रंगली आहे.
शिंदे गटाचे संभाव्य मंत्रिपदाचे समीकरण:
शिंदे गटाने तयार केलेल्या अहवालानुसार, सत्तार आणि राठोड यांच्या कामगिरीबाबत नाराजी व्यक्त करण्यात आली आहे. त्यामुळे त्यांना या वेळी संधी नाकारली जाणार आहे. दुसरीकडे, गुलाबराव पाटील, शंभूराज देसाई, उदय सामंत, आणि तानाजी सावंत यांना मंत्रिमंडळात स्थान कायम राहण्याची शक्यता आहे.
नव्या चेहऱ्यांची यादी तयार:
मंत्रिमंडळात नव्या चेहऱ्यांना स्थान देण्यासाठी भरत गोगावले, संजय शिरसाट, प्रताप सरनाईक, अर्जुन खोतकर, आणि विजय शिवतारे या नेत्यांची नावं चर्चेत आहेत. या नेत्यांची निवड शिंदे गटासाठी राजकीय दृष्टिकोनातून महत्त्वाची ठरणार आहे.
राजकीय रस्सीखेच सुरू:
लाल दिव्याच्या अपेक्षेने अनेक आमदारांनी मुंबईत तळ ठोकला आहे. एकाच जिल्ह्यातून अनेक इच्छुक असल्याने प्रमुख नेत्यांना वाटपावेळी मोठी कसरत करावी लागणार आहे. येत्या 11 किंवा 12 तारखेला नव्या मंत्रिमंडळाचा शपथविधी होण्याची शक्यता आहे.
